बयालीस दिनमै प्रगतिनगर खानेपानीको डिप बोरिङ् निर्माण कार्य सम्पन्न, ओभरहेड ट्याङ्कीको कार्य सुचारु

खगेन्द्र पराजुली

देबचुली, १७ जेठ

नवलपुरको देबचुलीमा रहेको प्रगतिनगर खानेपानी तथा सरसफाई उपभोक्ता समितिले शिलान्यास भएको ४२ दिनमै डिप बोरिङ् निर्माण कार्य सम्पन्न भएको छ भने ओभरहेड खानेपानी ट्यांकी निर्माण कार्य सुचारु रहेको छ ।

तराई मधेश संमृद्धि कार्यक्रम अन्तर्गत स्वीकृत योजना अनुसारको प्रथम चरणको काम आज सम्पन्न भएको खानेपानी संस्थाका अध्यक्ष खिमानन्द भुसालले जानकारी गराउनुभएको हो । कार्यालय परिसरमा ४ सय ५० घन मिटर क्षमताको ओभरहेड खानेपानी ट्यांकी र डिप बोरिङ्को सिलान्यास गत बैशाख ६ गते संघीय सरकारका संघीय मामिला तथा सामान्य प्रशासन मन्त्री लालवाबु पण्डितले गर्नुभएको थियो । निर्माणधिन परियोजना तराई मधेश संमृद्धि कार्यक्रम अन्तर्गतको २ करोड ६१ लाख रुपैया लागतमा निर्माण भइरहेको अध्यक्ष भुसालले जानकारी गराउनुभएको हो ।

त्यस्तै ४ दिने योजना निरिक्षणको क्रममा बुधवार आएका जाइकाका प्रतिनिधि सातोरु ओनिकी, यूसाकु नुमाजिरी, ईन्जिनियर दिपक सुवेदी, स्वीस गौचनको टोलीले प्रगतिनगरको खानेपानीको अवस्थाको निरीक्षण गरेका छन् । बिहिवार जाईका टोलीसँग सेडीमन्टेसन, रफिङ स्लोस्याण्ड क्लोरिनेशन युनिटको सञ्चालन विधि निरिक्षण पश्चात अन्तरक्रिया गरेको थियो ।  अन्तक्रियामा देवचुली नगरपालिकाका मेयर पूर्ण कुमार श्रेष्ठ, प्रमुख प्रशासकीय अधिकृत विष्णु प्रसाद भुसाल , ईन्जिनियर टिकाराम बस्याल, प्रगतिनगर खानेपानीका अध्यक्ष खिमानन्द भुसाल उपाध्यक्ष रुक्मागत भुसाल, सचिव ईन्द्रमणि भुसाल कोषाध्यक्ष विना बराल, लेखा संयोजक मथुरा प्रसाद श्रेष्ठ , सल्लाहकार तिल प्रसाद काफ्ले र कार्यालय प्रमुख पुमकान्त बसेल सहितको उपस्थितिमा योजनाको अनुगमनको उद्देश्य माथि जानकारी गराईएको थियो ।  अन्तक्रियामा आगामी दिनमा नगरपालिकाले योजनाको लागत अनुमान गर्दा खानेपानीमा हुन सक्ने क्षतिको ख्याल गर्दै लागत वजेटमा समेट्नुपर्ने सुझाव समेत रहेको छ  । जाईका टोलीले प्रगतिनगर खानेपानीको योजनाको निरीक्षण भोलीसम्म गर्ने जनाईएको छ ।