देवचुली १७ लाई बातावरणमैत्री वडा निर्माण गर्न अभियानः तालिम आयोजना र बिरुवा तथा सरसफाईका सामाग्री बितरण

खगेन्द्र पराजुली

देबचुली, १२ जेठ

देवचुली नगरपालिकाको रजहर स्थित वडा नम्वर १७ लाई बातावरणमैत्री वडा बनाउने अभियान अन्तर्गत बिरुवा बितरण तथा फोहोरमैला ब्यवस्थापन तालिम सञ्चालन गरिएको छ । चालु आर्थिक बर्ष ०७५–०७६ को बातावरण र फोहोरमैला ब्यवस्थापन कार्यक्रम अन्तर्गत अभियान सञ्चालन गरिएको वडाध्यक्ष बिष्णुप्रसाद आचार्यले बताउनुभयो । 

आज वडाभित्रका १ हजार ७ सय घरधुरीलाई वडाध्यक्ष आचार्यले निम, लिची र आँपका बिरुवा बितरण गर्नुभएको हो ।  ३ हजार ५० बिरुवा ल्याएकोमा वडाभित्र सरदरमा प्रतिघर २ वटा बिरुवा बितरण गरिएको जनाईएको छ । बजार क्षेत्रमा बिरुवा लगाउने ठाउँ नभएका र केही जग्गा तथा घडेरीमा घरहरु नभएकाले त्यस्ता ठाउँमा स्थानीयले नै बिरुवा नलगेकाले प्रति घरधुरी २ वटाका दरले बिरुवा बितरण गरिएको वडाध्यक्ष आचार्यले जानकारी गराउनुभयो । 

यसैबीच वडामा  २ दिने फोहोरमैला ब्यवस्थापन तालिमको उद्घाटन भएको छ । कार्यक्रममा देबचुली नगरपालिकाका मेयर पूर्णकुमार श्रेष्ठको प्रमुख आतिथ्यता तथा प्रमुख प्रशासकिय अधिकृत बिष्णुप्रसाद भुसालको बिशेष आतिथ्यता रहेको थियो । कार्यक्रममा सहभागीहरुलाई प्रशिक्षकका रुपमा रहनुभएका बद्री सापकोटाले सहजीकरण गर्नुभएको छ । 

तालिममा वडाभित्र रहेका १२ वटा टोल बिकास समिति र १४ वटा आमा समुहबाट २–२ जना सहित ५२ जना सहभागीहरु रहेको जनाईएको छ । रजहर खानेपानी संस्थाको सभाहलमा सञ्चालित तालिमका सहभागीहरुलाई भोली समापन कार्यक्रममा १–१ वटा ठूलो वकेट डस्टबिन, झाँडु र ड्रम बितरण गरी प्रत्येक टोलमा राखिने जनाईएको छ । 

बिरुवा बितरण तालिम तथा सामाग्री बितरण कार्यक्रम वडाको चालु आर्थिक वर्षको बातावरण र फोहोर मैला ब्यवस्थापन शिर्षकको ५ लाख रुपैया वजेटबाट गरिएको वडाध्यक्ष आचार्यले जानकारी दिनुभयो ।