देबचुलीका २८ जना ७ लाख धरौटीमा छुटे, एकादशी लक्षित निगरानी ब्यापक हुने

खगेन्द्र पराजुली

१९ कार्तिक, नवलपुर । 

देबचुलीको दलदलेबाट कौडा खालबाट पक्राउ परेका २८ जना आज मंगलवार धरौटीमा रिहा भएका छन् । 

जिल्ला प्रहरी कार्यालय नवलपुरले ७ लाख रुपैंया धरौटीमा सबै २८ जनालाई छोडेको हो । 

जिल्ला प्रहरी कार्यालय नवलपुरका अनुसन्धान प्रमुख राजेन्द्रप्रसाद अधिकारीका अनुसार अनुसन्धान प्रक्रिया पुरा गरी जनही २५ हजार रुपैंयाका दरले धरौटी जम्मा गरी उनीहरुलाई छोडिएको हो । 

गत १० गते लक्ष्मीपुजाका रात दलदलेस्थित एक पार्टी प्यालेसबाट पक्राउ परेका उनीहरु १० दिनपछि छुटेका छन् । 

उनीहरु कौडा खालबाट ५ लाख ८० हजार ५ सय ५० रुपैयाँ नगद, १ थान कौडा–बोर्ड, १६ थान कौडाका गोटी सहित पक्राउ परेका थिए । 

पक्राउ परेका उपर अनुसन्धानका लागी भन्दै प्रहरीले जिल्ला प्रशासन कार्यालय मार्फत पहिलो चरणमा ७ दिनको म्याद थपेको थियो । 

सो म्याद हिजो सोमवार सकिएसँगै प्रहरीले हिजो अर्को चरणको ७ दिने म्याद माग गरेकोमा आजै अनुसन्धानका प्रक्रिया सकिएकोले उनीहरुलाई धरौटीमा छोडिएको प्रहरीले जनाएको छ । 

अनुसन्धान प्रमुख अधिकारीले जुवातासजन्य गतिबिधिका बिरुद्धको प्रहरीको यो अभियान नियमित रहेकाले जुवाजन्य गतिबिधि नखेल्न नखेलाउन अनुरोध गर्नुभएको छ । 

प्रहरीले जुवातास गतिबिधिलाई समाजबाट दुरुत्साहन गर्न लागिपरेको दावी गर्दै अझ पनि ठूलो एकादशीका अवसरमा पनि जुवा चल्न सक्ने हुँदा प्रहरीले अझ ब्यापक निगरानी बढाउने बताउनुभयो ।