पश्चिम नवलपरासीका थप ३ जनामा भेटियो कोरोना

खगेन्द्र पराजुली, 

९ जेठ, नवलपुर । 

आज पश्चिम नवलपरासीका ३ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार रामग्राम नगरपालिकाका २ जना र सुस्ता गाउँपालिकाका १ जना गरी थप ३ जनामा संक्रमण पुष्टि भएको हो । 

योसँगै पश्चिम नवलपरासीमा कोरोना संक्रमितको संख्या ५ पुगेको छ । 

जिल्ला स्वास्थ्य कार्यालय पश्चिम नवलपरासीका प्रमुख गौरब ढकालका अनुसार रामग्राम नगरपालिकाका वडा नम्वर ३ का १ पुरुष र वडा नम्वर  १८ का १ महिला तथा सुस्ता गाउँपालिका वडा नम्वर ५ का एक पुरुषमा संक्रमण देखिएको हो । 

अहिले संक्रमित ३ जनालाई नै भैरहवास्थित भीम अस्पताल लैजाने तयारी भएको छ । 

यसअघि बैशाख ३१ मा प्रतापपुर गाउँपालिकाका १ जना र जेठ ७ गते बुधबार सुस्ता गाउँपालिकाका १ जना गरी २ जना पुरुषमा कोरोना संक्रमण पुष्टि भएको थियो । 

ती संक्रमितको भीम अस्पतालमा उपचार भैरहेको छ ।