आज ३ सय २३ जनामा संक्रमण पुष्टि, चितवनको हिजोको पुष्टि आजको अपडेटमा

खगेन्द्र पराजुली

२७ जेठ, नवलपुर । 

मंगलबार नेपालमा थप ३ सय २३ जनामा कोरोना संक्रमण पुष्टि भएको छ । आज संक्रमण पुष्टि हुनेमा २ सय ९२ जना पुरुष र ३१ जना महिला छन् । 

योसँगै नेपालमा कुल संक्रमितको संख्या ४ हजार ८५ पुगेको छ । 

केन्द्रले चितवनमा हिजो संक्रमण पुष्टि भएका सबै ३० जनालाई आजको अपडेटमा समेटेको छ । 

हिजो पछिल्लो २४ घण्टामा कोरोना संक्रमण पुष्टि भएर उपचार गराईरहेकामध्ये ९६ जना निको भएका छन् ।

९६ जना संक्रमणमुक्त भएसँगै कुल ५ सय ८४ जनालाई डिस्चार्ज गरिएको मन्त्रालयका प्रवक्ता डा. जागेश्वर गौतमले बताउनुभयो ।

निको हुनेमा पुरुष ५ सय ७ जना र महिला ७७ जना रहेको छन् । 

हालसम्म नेपालका ७७ जिल्लामध्ये ७२ जिल्लाका मानिसमा संक्रमण पुष्टि भएको छ ।

आज ईलाममा संक्रमित भेटिएका छन् । 

यस्तै, भरतपुर अस्पतालको आईसीयूमा आज एक जना कोरोना संक्रमितको मृत्यु भएसँगै मृत्यु हुनेको संख्या १५ पुगेको छ ।