सुखदः रजहरबाट ४९ जना डिस्चार्ज हुदैः गैंडाकोट १७ का २ जना भरतपुरबाट डिस्चार्ज

खगेन्द्र पराजुली, 

२१ असार, नवलपुर ।

रजहरस्थित प्राकृतिक आईशोलेशनमा बसेका संक्रमितमध्ये आज ४९ जनामा कोरोना नेगेटिभ देखिएको छ । 

योसँगै थप ४९ जना संक्रमणमुक्त भई निको भएको पुष्टि भएको चिकित्सालयका निर्देशक डा. बिनोद पौडेलले बताउनुभयो । 

आज आईतवार प्राप्त स्वाव नतिजामा नेगेटिभ पुष्टि भएसँगै उनीहरुलाई डिस्चार्ज गर्ने तयारीमा रहेको वहाँले बताउनुभएको छ । 

अहिले डिस्चार्ज हुनेहरुको डकुमेण्टेशनको काम गईरहेको जनाईएको छ । 

यस्तै, आजै भरतपुर अस्पतालबाट गैंडाकोट १७ का २ जना समेत डिस्चार्ज भएको गैंडाकोट नगर स्वास्थ्य शाखाका प्रमुख झलकराज पौडेलले बताउनुभएको छ । 

योसँगै नवलपुरमा डिस्चार्ज हुनेको संख्या १ सय ६ पुग्छ । 

नवलपुरमा पछिल्लो तथ्याङ्क अनुसार संक्रमितको संख्या २ सय ५७ रहेको छ । 

आज रजहरबाट डिस्चार्ज हुनेमा गैंडाकोटका २ जना, हुप्सेकोटका २ जना, बिनयीत्रिबेणीका ३ जना, मध्यबिन्दुका १७ जना, देबचुलीका १ जना, बौदीकालीका २२ जना, बुलिङटारका १ जना र देबघाटका १ जना गरी ४९ जना छन् ।