रजहर आयुर्वेदमा धनवन्तरी जयन्ती

खगेन्द्र पराजुली, 

नवलपुर, कार्तिक ६ । 

देवचुली नगरपालिका वडा नं. १६ मा रहेको नगर स्तरीय रजहर आयुर्वेद औषधालयमा आज धनवन्तरी जयन्ती तथा आरोग्य दिवस मनाईएको छ । 

आयुर्वेद उपचार पद्धतिको महत्वलाई जनमानससम्म पुर्याउन र आयुर्वेदको सकारात्मक पक्षको प्रचारप्रसार गर्न आयुर्वेदका प्रवर्तक धनवन्तरी जयन्ती आयुर्वेद औषधालयमा मनाईएको देवचुली नगरपालिकाको सूचना शाखाले जनाएको छ । 

देवचुली नगरपालिका वडा नं. १६ का अध्यक्ष केशवराज गौतमको अध्यक्षतामा भएको कार्यक्रममा नगर प्रमुख हरि प्रसाद न्यौपानेको प्रमुख आतिथ्यता रहेको थियो । 

नगर प्रमुख न्यौपानेले आधुनिक उपचारको बिकास हुनुभन्दा पहिला उपचार पद्धतिमा सवैभन्दा पुरानो उपचार विधि आयुर्वेदले स्वास्थ्य सेवामा खेलेको महत्वपूर्ण भूमिकालाई स्वीकार्नुपर्ने बताए । न्यौपानेले उपचारमा आयुर्वेद बिधि दीर्घ जीवनका लागि बरदान भएको स्पष्ट पारे । 

नगर प्रवक्ता एवं देवचुली ११ का वडा अध्यक्ष तिलप्रसाद काफ्ले र कार्यपालिका सदस्य पार्वती कंडेल अर्यालले आयुर्वेदिक उपचार, औषधि र यसले मानव जीवन र स्वास्थ्यमा पार्ने प्रभावका बारेमा बोलेका थिए । 

आयुर्वेद शाखा देवचुलीका प्रमुख कृष्ण प्रसाद शर्माको सञ्चालन रहेको कार्यक्रममा वडावासी स्थानीयको उपस्थिति रहेको थियो ।