मध्यविन्दुका मिठाई, किराना पसल अनुगमनः निरन्तर अनुगमनले गर्दा सुधार

नवलपुर, कार्तिक ६ । 

नवलपुरमा निरन्तर भईरहेको बजार अनुगमनका क्रममा केही सुधार पाईएको छ । आज जिल्ला प्रशासन कार्यालय, पर्यटन तथा उद्योग कार्यालय, नवलपुर उद्योग वाणिज्य संघ र पत्रकार महासंघ नवलपुरका प्रतिनिधिले मध्यविन्दुका दुई मुख्य बजार क्षेत्र चोरमारा र अरुणखोलामा संयुक्त रुपमा गरेको भएको अनुगमनमा प्रशासनिक प्रक्रियाका सामान्य त्रुटि बाहेक उपभोक्ता हितका विषयमा सुधार देखिएको पाईएको हो । 

अरुणखोलामा लेकबेशी खाजा घर एण्ड स्वीट कर्नरमा टोलीले अनुगमन गर्दा खुल्ला ठाउँमा मिठाई लगायतका खाद्य बस्तु उत्पादन (पकाउने) गर्दा ति तयारी बस्तुहरु खुल्ला ठाउँमा थिए । यसरी राख्दा खाद्य वस्तु दुषित हुने भएकाले सुरक्षित पकाउने ठाउँको ब्यवस्थापन गर्न र खाद्य बस्तुको  मुल्य, उत्पादन र म्याद सकिने मिति टाँस गर्न निर्देशन दिएको  छ । 

अरुणखोलाकै प्रकाश पवन किराना पसल निरिक्षण गर्दा बिक्रीका लागि राखिएका सामग्रीमध्ये नमूना छनोट गरी हेर्दा म्याद गुज्रिएका कुनै पनि सामान भेटिएनन् । मुल्यसूचीको बोर्ड राखिए पनि अपडेट नरहेको तथा ब्यवसाय दर्ताको कागजात र पसलमा टाँगिएको साइनबोर्डको नाम भिन्न भएकाले ति त्रुटिलाई सच्चाउन निर्देशन दिएको छ । 

अरुणखोलाकै सापकोटा मिठाई उद्योगमा भएको निरिक्षणमा भने खाजा घर सञ्चालन भएको पाईएपछि जुन प्रकृतिको ब्यवसाय गरिएको छ सोही अनुसारको दर्ता गर्न निर्देशन भएको छ । 

चोरमाराको आशिष मिष्ठान्न भण्डार र ह्युमन फुड बेकरी उद्योगमा पनि उत्पादित बस्तुको मुल्य, उत्पादन र उपभोग्य मिति उल्लेख गर्नुपर्ने निर्देशन छ ।   

यस्तै चोरमाराकै मध्यविन्दु दूध डेरी तथा किराना पसलमा भएको निरिक्षणमा दूधबाट बन्ने परिकारहरु उत्पादन भएको पाईएकोले त्यस्ता खाद्यबस्तु उत्पादन गर्न छुट्टै उद्योग दर्ता गर्न र सरसफाई राख्न निर्देशन दिएको छ । 

आइतवार भएको अनुगमनमा ति सवै ब्यवसाय दर्ता भएर सञ्चालनमा रहेको पाईएको छ । केही ब्यवसाय नगरपालिकामा मात्र दर्ता छन् भने केही नगरपालिका र घरेलु दुबैमा दर्ता भएका छन् । खाद्यबस्तु उत्पादन गर्ने प्रकृतिका ब्यवसाय मिठाई, बेकरी उद्योगलाई खाद्य गुणस्तर सम्वन्धि अनुज्ञा पत्र राख्न  निर्देशन गरेको छ । 

अनुगमन टोलीमा जिल्ला प्रशासन कार्यालयका प्रशासकीय अधिकृत भरत सापकोटा, जिल्ला प्रहरी कार्यालयका प्रहरी निरिक्षक गोपाल प्रसाद चालिसे, नवलपुर उद्योग बाणिज्य संघका अध्यक्ष बैकुण्ठ प्रसाद अर्याल, पर्यटन तथा उद्योग कार्यालयका अधिकृत खडक बहादुर थापा, पर्यटन तथा उद्योग कार्यालयका कम्प्युटर अपरेटर नरेन्द्र देव भुसाल र पत्रकार महासंघ नवलपुरका सदस्य खगेन्द्र पराजुलीको सहभागिता थियो ।