जित निश्चित छ, ढुक्क छु– स्वतन्त्र उम्मेदवार काफ्ले

नवलपुर, कार्तिक ५ । 

नवलपुर १ ख का स्वतन्त्र उम्मेदवार चोकनारायण काफ्ले (नारायण)ले जनताको सेवक बन्न उम्मेदवारी दिएको बताएका छन् । देवचुली पर्वत समाजका अध्यक्ष समेत रहेका काफ्लेले आफ्नो उम्मेदवारी कसैसँगको प्रतिस्पर्धा नभएर आम क्षेत्रबासी जनताको खुसीका लागि भएको बताए । उनले आफ्नो जित निश्चित रहेकाले आफु ढुक्क भएको सुनाए । 

स्थानीय निर्वाचन लगत्तै मंसिरमा हुने चुनावमा उम्मेदवारी दिने घोषणा गर्दै भेटघाटमा सक्रिय रहेका काफ्लेले आफ्नो क्षेत्रको भ्रमण गरिसकेका कारण अव पुनर्ताजगीका लागि आफ्नो चुनाव चिन्ह धारा चिनाउन मतदाता भेटघाटमा जाने बताए । 

आफूसँग गर्न नसकिने ठूला आश्वासन नहुने तर नारायणीको तिरदेखि देवचुलीको शिरसम्मको पूर्वाधार बिकास, गर्भको भ्रुणदेखि पञ्चतत्वसँगको मिलनसम्मको सुरक्षण अधिकारसहितको मानवीय बिकास मार्फत परिवर्तन गर्ने हुटहुटी आफ्नो लक्ष्य रहेको सुनाए । 

उनले यो निर्वाचनलाई खेलको रुपमा लिएकोले अनुशासित खेलाडीका रुपमा आफू मैदानमा उत्रिएको बताए । 

उनले जनतामा राजनैतिक दलप्रतिको बिश्वास गुमेका कारण र आफु बिभिन्न सामाजिक क्षेत्रमा रहेको कार्य अनुभव, पर्यटन, संस्कृति र ब्यवसाय समेतमा आफ्नो अनुभव भएकोले सबै क्षेत्रका शुभचिन्तक तथा क्षेत्रवासी मतदाताको माया नै आफ्नो जितको आधार भएको बताए । 

काफ्ले होटल व्यावसायी संघ नवलपुरका उपाध्यक्ष, लायन्स कल्ब अफ देबचुली दिब्यका अध्यक्ष समेत हुन् ।