वालिङका थप १ जनामा संक्रमण, गण्डकीमा संक्रमितको संख्या १ सय १४ पुग्यो

खगेन्द्र पराजुली

२५ जेठ, नवलपुर । 

गण्डकी प्रदेशमा आज आईतवार फेरी १ जनामा संक्रमण पुष्टि भएको छ । संक्रमण पुष्टि हुनेमा स्याङजा वालिङकै एक जना भएको गण्डकी जनस्वास्थ्य निर्देशनालयले जनाएको छ । 

थप १ संक्रमित पुष्टि भएसँगै गण्डकीमा कोरोना संक्रमितको संख्या  १ सय १४ पुगेको छ भने स्याङजामा ३८ जनामा संक्रमण पुष्टि भएको छ । 

निर्देशनालयका अनुसार पोखराको गण्डकी प्रदेश स्वास्थ्य बिज्ञान प्रतिष्ठानको प्रि–आईशोलेशन वार्डमा उपचाररत ६० बर्षका वृद्ध पुरुषमा संक्रमण पुष्टि भएको हो । 

वालिङ स्वास्थ्य शाखा प्रमुख कमल पाण्डेले दिनुभएको जानकारी अनुसार वालिङ नगरपालिका वडा नम्वर ३ को माझकोटका ती संक्रमित ब्यक्ति गत जेठ २१ गते भारतवाट आएका थिए । 

आफ्नो स्वास्थ्य उपचारका लागी भारतको दिल्ली गएका उनी सुनौली नाका हुदै नेपाल आएपछि आफै एउटा निजी गाडी ब्यस्था गरी वालिङ आएको जनाईएको छ ।   उनलाई सिधै क्वारेन्टाईनमा राखिएको थियो । क्वारेन्टाईनमा रहदा नै स्वास्थ्यमा समस्या देखिएपछि अस्पताल पठाईएको यहाँको स्वास्थ्य शाखाले जानकारी दिएको छ । 

ती ब्यक्ति मृगौलाको समस्याका कारण उपचारका लागी भारत गएका थिए । 

निम्न आर्थिक अवस्थाका उनी कोरोना संक्रमणका कारण सिर्जित असहज अवस्थाका भारतमा समेत सबै उपचार सम्पन्न गर्न नसकी उनी फर्कनुपरेको बुझिएको छ । 

उनीसँगै उनकी श्रीमती पनि सँगै आएकी हुन् । ती ब्यक्तिसँग निकट सम्पर्कमा रहेकाहरुको खोजपडताल भैरहेको वालिङ स्वास्थ्य शाखाले जनाएको छ । 


उनलाई सुनौलीबाट वालिङसम्म लिएर आउने गाडी सहित चालकको खोजपडतालका लागी रुपन्देही मार्फत बुटवललाई  सन्देश पठाईसकिएको जनाईएको छ । 

अहिले ती ब्यक्तिसँग सम्पर्कमा रहेकाहरुको कन्ट्याक्ट ट्रेसिङ शुरु भएको छ । 

आज बिहानको थप संक्रमितको खवर पढ्न यो पनि पढ्नुहोस् ।  

गण्डकी प्रदेशमा एकैदिन ३८ नयाँ संक्रमित थपिएः संक्रमित १ सय १३